“Tv Musavat” hakerlərin əlinə keçdi – Bütün videolar SİLİNDİ

“TV Musavat” Youtube kanalı hakerlərin hücumuna məruz qalıb.

Turanmedia.az tns-ə istinadən xəbər verir ki, bu barədə Musavat.com-a “TV Musavat”ın efir rejissoru və təhlükəsizlik üzrə məsul şəxsi Məhəmməd Türkmən məlumat verib.

O bildirib ki, saat 23 radələrində kanal qəfil haker hücumuna məruz qalıb. M.Türkmənin sözlərinə görə, bir neçə saniyə içərisində kanalın şifrəsi ələ keçirilib və hesabdakı videolar silinib.

“Yeni Müsavat” Media Qrupunun rəhbəri Rauf Arifoğlu sözügedən hadisənin sui-qəsd olduğunu və bunun kanalın çökdürülməsinə hesablandığını qeyd edib. O bildirib ki, məsələ ilə bağlı Dövlət Təhlükəsizlik Xidmətinə və Prezident Administrasiyasına məlumat verilib və kömək istənilib.