SOCAR-ın STAR-ı 250 milyon dollar borc ödəyib – FOTO

Ötən il SOCAR-ın emal gücü 10 milyon ton həcmində müəyyənləşdirilən STAR Neft Emalı Zavodu (NEZ) planı aşaraq 10,5 milyon ton xam neft emal edib.

Dövlət Neft Şirkətindən (SOCAR) Oxu.Az-a verilən məlumata əsasən, STAR NEZ ötən il 250 milyon dollardan çox kreditin geri ödənilməsinə nail olub.

Bildirilib ki, Türkiyənin ən böyük birbaşa xarici investoru olan “SOCAR Türkiyə”nin törəmə müəssisəsi olan STAR NEZ 2020-ci ildə qlobal pandemiya ilə bağlı məhdudiyyətlərə baxmayaraq rekorda imza atıb.

2020-ci ildə təxminən 10,3 milyon tonluq satış həyata keçirən zavod bu həcmin təxminən 70 faizini daxili bazara yönəldərək, Türkiyə iqtisadiyyatına proqnozlaşdırılan töhfəni verib.

“SOCAR Türkiyə”nin Emal və Neft-Kimya bölməsinin rəhbəri Anar Məmmədov vurğulayıb ki, “Petkim”in xammalı olan naftanın tədarükü ilə yanaşı daxili bazarda həyata keçirilən satışlarla Türkiyənin cari kəsirinin azalmasına mühüm töhfə verilib:

“STAR NEZ-də sahib olduğumuz qabaqcıl texnologiya, “Petkim”lə inteqrasiya, əlverişli rəqəmsal transformasiya modelimiz, səmərəli istehsal planı və optimallaşdırma prosesləri bu uğuru qazanmağımız üçün şərait yaratdı. Pandemiya səbəbindən təyyarə yanacağına tələbatın azalmasını nəzərə alaraq, potensialımızı sürətlə dizel yanacağına yönəldib fasiləsiz istehsala davam edə bildik.

Xüsusilə, 2020-ci ilin ikinci yarısından etibarən 100 faizdən artıq istehsal gücü ilə çalışaraq zavodumuzun xam neft emalı həcmini 10,5 milyon tona qaldırdıq. Bizə qürur verən bu yüksək göstəricilərə görə hər biri öz sahəsində məsuliyyətlə çalışan bütün həmkarlarıma təşəkkür edirəm”.

2020-ci ildə neft qiymətlərində azalmanın təsiri ilə emal gəlirlərinin də aşağı düşdüyünü sözlərinə əlavə edən Anar Mammadov qeyd edib ki, 6,3 milyard dollarlıq dəyəri ilə Türkiyədə real sektorun tək nöqtəyə yatırdığı ən böyük investisiya layihəsi olan STAR NEZ bu çətin ildə 250 milyon dollardan çox kreditin geri ödənilməsinə nail olub:

“Bundan əlavə zavodumuzun anbar tutumunu və əməliyyat elastikliyini artıracaq investisiyalarımızı da davam etdiririk. Bu çərçivədə, təxminən 45 milyon dollarlıq sərmayə büdcəsinə malik olan “NEZ-in elastikliyinin, iş qabiliyyətinin və gəlirliliyinin yaxşılaşdırılması” layihəsini (IFOP) bu il başa çatdıracağıq. IFOP layihəsi ilə birlikdə ümumi dəyəri təxminən 600 milyon dollar təşkil edən və böyük hissəsi əlavə anbar tutumu ilə əlaqədar olan yeni investisiyalarımızı da 2022-ci ildə tamamlamağı planlaşdırırıq”. 

Xatırladaq ki, fəaliyyətə başladıqdan 1 il sonra, 2019-cu ildə İstanbul Sənaye Palatasının “Türkiyənən 500 böyük sənaye qurumu” siyahısında 5-ci yeri tutan STAR NEZ inkişaf etmiş konfiqurasiyası sayəsində 100 növdən artıq nefti emal etmək qabiliyyətinə malikdir. Türkiyədə xam neft emal edən iki müəssisədən biri  olan STAR NEZ bu baxımdan da ölkə iqtisadiyyatına mühüm töhfə verir.

---

Məlumat oxu.az saytından götürülmüşdür.