Bakı metropoliteni üçün yeni vaqonların istehsalı davam edir

12 Baxış

Rusiyanın “Transmaşholdinq” SC-nin tərkibinə daxil olan “Metrovaqonmaş” müəssisəsində Bakı metropoliteni üçün innovasiyalar baxımından müasir standartlara cavab verən 81-760.B/761.B/763.B tipli vaqonların istehsalı davam etdirilir.

Turanmedia.az xəbər verir ki, bu barədə QSC-dən Ölkə.az-a məlumat verilib.

Bildirilir ki, 2019-cu ilin oktyabrında bağlanmış üçillik müqaviləyə uyğun olaraq, adıkeçən müəssisə 2020-2022-ci illər ərzində “Bakı Metropoliteni” QSC-ni hər il 20 vaqon olmaqla, ümumilikdə 60 yeni vaqonla təmin etməlidir. Əvvəlki iki ildə belə vaqonlardan 40-ı Bakı metropoliteninə gətirilərək, sazlama və sınaq işlərindən sonra xəttə buraxılıb.

Cari ildə Bakı metropoliteninin yerli texniki-istismar tələblərinə uyğun istehsalı aparılan bir qatarın rənglənməsi prosesi artıq başa çatdırılıb. Hazırda mexaniki, pnevmatik, elektrik hissələr quraşdırılır. Bu xüsusda elektrik sistemində yüksək gərginlikli dövrələrin montajı tamamlanmaqdadır. Vaqon qapıları sisteminin quraşdırılması da son mərhələdədir. İstehsalın yekun mərhələsində quraşdırılan vaqonaltı avadanlığın, o cümlədən dartı mühərriki və təkər cütlərinin yığılması prosesi də bitmək üzrədir.

Tədarükçü müəssisə yaxın vaxtlarda qatarda işləri tamamlayaraq sınaqlara başlayacaq. Sonra “Bakı Metropoliteni” QSC nümayəndələrinin iştirakı ilə vaqonların yekun sınaqları və qəbulu əməliyyatları aparılacaq.

81-760.B/761.B/763.B tipli vaqonlar haqqında qısa olaraq əlavə edək ki, baş vaqonlar 38 oturacaqlı olmaqla, 315 yerlik, orta vaqonu isə 44 oturacaqlı olmaqla 328 yerlikdir. Vaqonlar mikroiqlim nəzarəti, o cümlədən soyutma və ultrabənövşəyi bioloji təmizləmə sistemləri ilə təchiz olunur.

Salon qapıları daha enlidir və bu, sərnişinlərin minib-düşməsini sürətləndirir, avtomatik sensorlu açılıb-bağlanma sistemi isə təhlükəsizliyi artırır. Mobil cihazların doldurulması, müasir erqonomik işıqlanma sistemləri, tutacaqlar, vaqondan vaqona birbaşa keçidlər, sərnişin salonunun dizaynı və digər məsələlərin hər biri sərnişin rahatlığını optimallaşdırır.

Daxili videomüşahidə və yanğın əleyhinə müasir avtomatik sistemlərin tətbiqi hərəkət təhlükəsizliyini əhəmiyyətli dərəcədə artırır. Maşinist kabinası avtomatik idarəetmə, sayıqlığa nəzarət və intellektual dəstək sistemləri ilə təchiz edilib. Məlumatın yığılması, saxlanması və maşinist monitoruna ötürülməsini nəzərdə tutan özünüdiaqnostika sistemi hərəkət təhlükəsizliyi və idarəetmə rahatlığını optimal həddə çatdırır.