Gürcüstan koronavirusa qarşı hansı peyvənddən istifadə edəcək?

“Gürcüstanın Hindistandan koronavirus peyvəndi almaq şansı daha çoxdur, ancaq Çin və Qərblə danışıqlar davam edir”.

“Sputnik Gürcüstan” xəbər verir ki, bunu ölkənin Xəstəliklərə Nəzarət və İctimai Sağlamlığı Milli Mərkəzinin rəhbərinin müavini Paata Imnadze deyib.

“Peyvənd almaq üçün ən böyük şansımızın olduğu ölkə ÜST tərəfindən tanınan ən böyük peyvənd istehsalçılarından biri olan Hindistandır. Çin tərəfi və qərbli tərəfdaşlarla da müəyyən danışıqlar gedir. Söz verildi, amma təəssüf ki, Avropa ölkələri bizimlə bölüşəcək qədər peyvənd əldə edə bilmirlər”.

Onun sözlərinə görə, dünya bazarında peyvənd çatışmazlığı var və istehsalçılar tələbatı ödəmək üçün istehsalı genişləndirə bilməyiblər. Vətəndaşlarının vaksinasiya olunma göstəricisi ən yüksək olan ölkə İsraildir (30%), ardınca ABŞ (22%) və Avropa İttifaqı (7%) gəlir.

COVAX platforması ilk növbədə donor yardımından asılı olan ölkələrə peyvənd tədarükünə başlayıb. Onlar özlərini maliyyələşdirən və vaksin üçün pul ödəyən ölkələrdən fərqli olaraq peyvəndləri endirimli qiymətlərlə alırlar. Bu siyahıya Gürcüstan da daxildir.

Daha əvvəl Gürcüstan Səhiyyə nazirinin müavini Tamar Qabuniya bildirib ki, COVAX platforması çərçivəsində Gürcüstan da daxil olmaqla 18 ölkə istisna kimi “Pfizer” peyvəndi alacaq.

---

Məlumat oxu.az saytından götürülmüşdür.