Nikol etiraf etdi, müxalifət parlamentdən qaçdı: “Siz Qarabağın Azərbaycanın olduğunu tanıdınız”

16 Baxış
Turanmedia.az xəbər verir ki, Ermənistanın baş naziri Nikol Paşinyan ölkə parlamentində müxalif deputatlarla mübahisə edib.

O, müxalifətin baş nazirin Qarabağla bağlı danışıqlar prosesini uğursuzluğa düçar etməsi ilə bağlı ittihamlarına sərt cavab verib.

Erməni müxalifətinin baş nazirdən tələbi birmənalı olub: Nikol Paşinyanın istefası.

Nikol Paşinyan isə öz növbəsində danışıqlar prosesini eks-prezident Serj Sarqsyanın uğursuzluğa düçar etdiyini bildirib. O, Ermənistanın üçüncü prezidentinin Qarabağ məsələsinin dinc yolla həllinə ümid etməməklə bağlı sözlərini xatırladıb.

Nikol Paşinyan müxalifətin onun müharibəni dayandıra bilməməsi barədə ittihamlarına isə etirafla cavab verib:

“2020-ci ilin 27 sentyabrında – hərbi əməliyyatların başladığı gün parlament tribunasından müharibənin hansı şərtlər daxilində dayandırılacağını açıqladım. Bu şərt Qarabağın Azərbaycanın tərkibində olması idi. Siz hədəflərdən danışırsınız. Ancaq mən qeyd etmək istəyirəm ki, “Daşnaksütun” Partiyası koalisiyada olan zaman Ermənistan danışıqların Madrid prinsipləri əsasında aparılmasına razılaşmışdı. Məhz həmin vaxt siz Qarabağın Azərbaycanın tərkibində olduğunu tanıdınız”.

Paşinyanın açıq etirafı müxalif deputatları qəzəbləndirib. Onlar baş naziri məsuliyyəti keçmiş rəhbərliyin üzərinə atmaqda günahlandırıblar. Bu zaman parlamentdə səs-küy yaranıb, deputatlar bir-birinə replika atmağa başlayıblar. Nikol Paşinyan müxalifətin onun əks-arqumentlərini dinləmək istəmədiyini bildirdikdə isə müxalif deputatlar parlament zalını tərk ediblər.

Ermənistan baş naziri müxalifətin bu addımını lağa qoyub: “Qaçırsınız! Həmişəki kimi!”