Ötən ilin müdafiə və təhlükəsizlik xərcləri AÇIQLANDI

2020-ci ildə müdafiə və milli təhlükəsizlik xərclərinə dövlət büdcəsi xərclərinin 16,8 faizi həcmində və ya 4 milyard 425,4 milyon manat vəsait yönəldilib.

Oxu.Az-ın məlumatına əsasən, bununla bağlı “Azərbaycan Respublikasının 2020-ci il dövlət büdcəsinin icrası haqqında” qanun layihəsində bildirilib.

Sənəddə yazılıb ki, bu rəqəm 2019-cu illə müqayisədə 1 milyard 63 milyon 800 min manat çoxdur.

Sənəddə o da bildirilir ki, büdcədən müdafiə xərclərinə əlavə ayrılmış vəsait hesabına yeni hərbi texnika alınıb.

Həmçinin ön cəbhəyə ezam olunmuş hərbi qulluqçuların və səfərbərliklə hərbi xidmətə çağrılmış heyətə xidmət etdiyi müddətdə aylıq vəzifə maaşı və ona müəyyən edilmiş aylıq əlavənin ödənilməsi qarşılanıb.

Qeyd edək ki, layihə parlamentin İqtisadi siyasət, sənaye və sahibkarlıq komitəsinin bugünkü iclasında birinci oxunuşda müzakirəyə çıxarılacaq. 

Aqşin Kərimov

---

Məlumat oxu.az saytından götürülmüşdür.