95 faiz valideyn uşaqlarının əyani dərslərdə iştirakını istəyib – RƏSMİ

Təhsil müəssisələrində tədris və təlim-tərbiyə proseslərinə dair müvəqqəti qaydalara əsasən uşaqlarını məktəbə göndərmək istəməyən valideynlər üçün xüsusi iltizam vərəqəsi yazması təklif edilirdi. Lakin əyani dərslər başlayandan intizam yazan valideynlərin sayı azalıb.

Oxu.Az-ın müxbirinin məlumatına görə, bu barədə Təhsil Nazirliyinin Ümumi təhsilin təşkili və idarəolunması şöbəsinin müdiri Rəşad Tağıyev bu gün “Yuxarı siniflər və universitetlərdə ənənəvi tədrisin qismən bərpası” mövzusunda Təhsil Nazirliyinin “Facebook” səhifəsi üzərindən keçirilən canlı yayımda məlumat verib.

O bildirib ki, bu iltizam vərəqəsi ilə valideyn öz üzrəinə məsuliyyət göstürürdü:

“Məsuliyyət odur ki, valideyn uşağının teledərslərdə iştirakını təmin edəcək, qiymətləndirmə əyani formada keçirilərsə uşaqları mütləq qaydada məktəbə gətirməlidirlər. Son dörd gün ərzində artıq bəzi siniflər üzrə dərslər əyani sürətdə başlayıb. Lakin sizə deyim ki, iltizam yazılması halları çoxluq təşkil etmir.

Bakı şəhəri üzrə iltizam yazaraq şagirdləri əyani dərslərdən saxlamaq istəyən valideynlərin sayı təxminən 3 faizdir. 95 faiz isə uşaqlarının əyani dərslərdə iştirakını istəyib”

---

Məlumat oxu.az saytından götürülmüşdür.