Həkim: “Uşaqlar yeni növ koronavirusa yoluxmada daha fəal rol oynayır”

Koronavirusun birinci dalğasında azyaşlılar arasında virusa yoluxma hallarına çox rast gəlinmirdi. Lakin son dövrlərdə uşaqlar, məktəblilər arasında koronavirusa yoluxma hallarına tez-tez rast gəlinir. 

Bu da özlüyündə virusun yayılmasını sürətləndirən məqamlardan hesab olunur. Azyaşlılar virusu yüngül, simptomsuz keçirsə də, daşıyıcı olaraq ciddi təhlükə mənbəyidirlər. 

Bəs uşaqları COVID-19 xəstəliyindən necə qoruyaq? 

Bu sualı Oxu.Az-a açıqlamasında Mərkəzi Gömrük Hospitalının pediatr-neonatoloqu Aygün Sadıxova cavablandırıb.

Onun sözlərinə görə, uşaqlar COVID-19 xəstəliyinin gizli daşıyıcıları ola bilər:

“COVID-19 pandemiyası yeni başlayan dövdə uşaqların virusa yoluxmaları nadir hal sayılırdı. Hazırda isə bütün dünyada minlərlə uşağın bu təhlükəli xəstəliyə yoluxması halları qeydə alınıb. Uşaqlar əvvəllər olduğu kimi yenə parklarda, meydançalarda bir-biri ilə oynayırlar. Onların bir-birindən yoluxub gizli daşıyıcı ola biləcəyini nəzərə alsaq, deyə bilərik ki, uşaqlar yeni növ koronavirus infeksiyasına yoluxmada fəal rol oynayırlar. Ona görə də, bu gün uşaqlarımızın COVID-19 xəstəliyindən qorunması məsələsi çox aktualdır. 

Məsləhət görərdim ki, bütün valideynlər uşaqlara gigiyenik qaydalara riayət etməyi, sosial məsafə saxlamağı öyrətsinlər. Əlbəttə ki, uşaqların öz nənə və babalarının, başqa qohumlarının yanına qonaq getməsi yaxşı haldır, amma pandemiya dövründə bu, yaşlı insanları yoluxma təhlükəsi ilə qarşı-qarşıya qoymaq deməkdir. Bu əlaqələri minimuma endirmək məsləhətdir. Həmçinin, uşaqların bir-biri ilə tez-tez ünsiyyətdə olmasını da azaltmaq lazımdır. Böyük bayram tədbirlərindən, ad günlərindən isə hələlik uzaq olmaları yaxşıdır”.

Həkim uşaqların virusa yoluxmaması üçün onların immunitetinin də möhkəmləndirilməsinə diqqət yetirilməli olduğunu da deyir:

“İlk növbədə, onların sağlam qidalanması və düzgün tərtib edilmiş gündəlik rejim mühüm rol oynayır. Gündəlik qida rasionunda zülalların kifayət qədər yer tutması zəruridir. Uşaqlar hər gün ət, kəsmik, süd məhsulları, vitamin və minerallarla zəngin meyvə-tərəvəz qəbul etməlidirlər. 
İmmunitetin gücləndirilməsində yuxunun böyük əhəmiyyəti var. Uşaqlar hər gün eyni vaxtda yatmalı, səhərlər yuxudan doymuş halda oyanmalıdır.

Gecə yuxusu 8 saatdan az olmamalıdır. Məsləhətdir ki, uşaqlar saat 22:00-a qədər yatmağa getsinlər. Belə ki, bu vaxt yuxuya getmiş uşaqların orqanizmində immuniteti bərpa edən və tənzimləyən hormonlar, o cümlədən melatonin hazırlanır. Ümumiyyətlə, hər gün erkən yatan uşaqlar respirator virus infeksiyalarına az yoluxurlar. Uşaqlarda COVID-19 xəstəliyinin hər hansı əlamətlərini müşahidə etdikdə, özbaşına müalicə etməmək, mütləq pediatra müraciət etmək lazımdır”.

Könül Cəfərli

---

Məlumat oxu.az saytından götürülmüşdür.