Akkan Suver: “Heydər Əliyev əvvəlcə Azərbaycanın birliyini təmin etdi”

Böyük insanların yalnız doğum tarixləri olur. Onlar aramızdan ayrıla bilərlər, amma düşüncələri və ideyaları ilə daim bizimlədirlər. Ümummilli Lider uzaqgörənliyi və dünyaya baxışı ilə yalnız Azərbaycan torpaqlarında deyil, bütün türk dünyası coğrafiyasında yaşamağa davam edir. Müasir Azərbaycanın qurucusu Heydər Əliyev hakimiyyətə qayıdanda qardaş ölkə ağır günlərini yaşayırdı, Qarabağ ermənilər tərəfindən işğal olunmuş, ölkədaxili çəkişmələr şiddətlənirdi. Azərbaycan tarixinin ən böhranlı dövrünü yaşayırdı. Azərbaycanın müstəqilliyinin itirilməsi təhlükəsi ilə üz-üzə bir dövrdə Heydər Əliyev xalqın dəvətinə müsbət cavab verərək hakimiyyətə gəldi.

Turanmedia.az xəbər verir ki, bu fikirləri Azərtac-a müsahibəsində “Mərmərə Qrupu” Strateji və Sosial Araşdırmalar Vəqfinin sədri professor Akkan Suver ifadə edib.

O deyib ki, Heydər Əliyev hakimiyyətə gəldikdən dərhal sonra ölkədaxili sabitliyi bərqərar etdi, Azərbaycanın beynəlxalq nüfuzunu artırmaq və ermənilərin işğalı altında olan torpaqların danışıqlar yolu ilə azad olunması istiqamətində fəaliyyətə başladı.

ATƏT-in Lissabon Sammitində Ümummilli Lider gərgin səyləri ilə Qarabağın Azərbaycan ərazisi kimi qeyd edilməsinin o dövr üçün fövqəladə uğur olduğunu deyən professor vurğulayıb:

“1997-ci ildə Lissabonda əldə edilən bu müvəffəqiyyət 23 il sonra qazanılacaq Qələbə istiqamətində atılmış ilk addım idi. Heydər Əliyev ömrü boyu Qarabağ məsələsini diqqətdə saxlayıb, Ermənistanın işğal siyasətini və törətdiyi cinayətləri hər platformada beynəlxalq aləmə çatdırıb. O, Qarabağ mövzusunda çox həssas və qətiyyətli idi. Ümummilli Lider bu qətiyyəti Mixail Qorbaçovun Qarabağ və Bakı ilə bağlı siyasətinə görə SSRİ-yə etirazını bildirərək, Kommunist Partiyası üzvlüyündən istefası ilə nümayiş etdirdi. Bu, o günün şərtləri daxilində asan davranış deyildi. Ancaq Qarabağ məsələsinə olan həssaslığı və o dövrdə Rusiyanın Azərbaycanla bağlı yürütdüyü siyasət Onu bu addımı atmağa vadar etdi. Ulu Öndər onillik hakimiyyəti dövründə əvvəlcə Azərbaycanın birliyini təmin etdi, sonra isə milli səviyyədə və beynəlxalq aləmdə ölkənin sosial, mədəni və iqtisadi sahələrdə inanılmaz nailiyyətlər qazanmasına nail oldu. Bu nailiyyətlərdən biri də müasir Azərbaycan Ordusudur. Heydər Əliyevin hakimiyyəti dövründə Azərbaycan Silahlı Qüvvələrinin modernləşdirilməsi və Qərb standartlarına uyğunlaşdırılmasına nail olmaq üçün mühüm səylər göstərilmişdi. Məhz bu addımların nəticəsi olaraq Ulu Öndərin əbədiyyətə qovuşmasından 17 il sonra Şuşada, Zəngilanda, Kəlbəcərdə, Ağdamda, Qubadlıda, Cəbrayılda, Füzulidə, Laçında Azərbaycan bayrağı dalğalanmağa başladı. Dahi Heydər Əliyevin siyasi kursunu uğurla davam etdirən Prezident İlham Əliyev Ulu Öndər tərəfindən başladılan danışıqları səbirlə davam etdirdi. Şanlı Azərbaycan Ordusu ölkəmizin tələbləri ilə razılaşmayan Ermənistanı diz çökdürdü”.

Akkan Suver qeyd edib ki, Azərbaycanın Qarabağda qazandığı Zəfər qardaş dövlətin və Prezident İlham Əliyevin Heydər Əliyev siyasi kursuna sadiqliyinin sübutu və məntiqi nəticəsidir. //Turanmedia.az