Cəmi 16 gün… – Azərbaycanda ən qısa müddətə nazir olmuş şəxslərin siyahısı

17 Baxış

Xəbər verdiyimiz kimi, ölkə başçısının sərəncamı ilə Anar Kərimov mədəniyyət naziri vəzifəsindən azad edilib. Qeyd edək ki, o, bu posta 5 yanvar 2021-ci ildə təyin edilmişdi.

Bununla da bir ildən bir qədər artıq nazir vəzifəsi daşıyan Anar Kərimov qısa müddətdə vəzifədə qalmış məmurlar siyahısında yer alıb.

Maraqlıdır, Azərbaycanda qısa müddətdə nazir postunda olmuş başqa kimlər var?

Turanmedia.az sfera.az-a istinadən son 30 ildə qısa müddətdə nazir kreslosunu təhvil verən şəxslərin siyahısını təqdim edir:

Baş nazirlər:

Novruz Məmmədov (18 ay) – 21 aprel 2018-ci il tarixindən Azərbaycan Respublikasının Baş naziri təyin edilib, 8 oktyabr 2019-cu ildə bu vəzifədən istefa verib.

Fuad Quliyev (14 ay) – 2 may 1995 – 20 iyul 1996-cı illər.

Pənah Hüseyn ( 2 ay) – 1993-cü ilin aprel ayından iyun ayınadək Azərbaycan Respublikasının Baş naziri vəzifəsində işləyib.

Rəhim Hüseynov (8 ay) – 1992-ci ilin mayından 1993-cü ilin yanvar ayına kimi Azərbaycanın Baş naziri vəzifəsində çalışıb.

Surət Hüseynov (16 ay) – 1993-cü il iyununda dövrün Milli Məclis sədri və prezident səlahiyyətlərinin icraçısı Heydər Əliyev tərəfindən Baş nazir təyin olunub və 1994-cü ilin oktyabrında vəzifəsinin icrasına son verilib.

Daxili işlər nazirləri:

Məhəmməd Əsədov (19 ay) – 17 aprel 1990-cı ildən 13 noyabr 1991-ci ilə kimi nazir vəzifəsində olub.

Tofiq Kərimov (3 ay) – 21 noyabr 1991-ci ildən 20 fevral 1992-ci ilə qədər vəzifdə olub.

Tahir Əliyev (3 ay) – 24 fevral 1992 – 25 may 1992-ci il.

İsgəndər Həmidov (11 ay) – 26 may 1992 – 16 aprel 1993-cü illər.

Rövşən Cavadov (16 gün) – 17 iyun – 3 iyul 1993-cü il.

Abdulla Allahverdiyev (2 ay) – 21 aprel – 25 iyun 1993-cü il.

Vaqif Novruzov (9 ay) – 7 iyul 1993 – 29 aprel 1994-cü illər.

Müdafiə nazirləri

Valeh Bərşadlı (3 ay) – Azərbaycan Respublikasının ilk müdafiə naziridir və 1992-ci ildə tutduğu vəzifədən istefa verib.

Dadaş Rzayev (4 ay) – 20 fevral 1993–17 iyun 1993-cü il.

Rəhim Qazıyev (11 ay) – 1992-ci il martından 1993-cü il fevralına qədər Azərbaycan Respublikasının müdafiə naziri vəzifəsində çalışıb.

Şahin Musayev (1 ay) – 1992-ci ilin yanvar və fevral aylarında nazir postunda olub.

Tacəddin Mehdiyev (2 ay) – 11 dekabr 1991 — 17 fevral 1992-ci illər.

Tahir Əliyev (21 gün) – 24 fevral 1992 – 17 mart 1992-ci il.

Vahid Musayev (12 gün) – 13 avqust 1993-cü ildən həmin ilin 25 avqustunadək müdafiə nazirini əvəzləyib.

Bundan başqa Azərbaycan Respublikası Prezidentinin 7 mart 2014-cü il tarixli Sərəncamı ilə Azərbaycan Respublikasının Rabitə və Yüksək Texnologiyalar naziri Əli Abbasov da vəzifəsində cəmi 20 ay, yəni təqribən iki il müddətində qala bilib. Belə ki, o, 12 noyabr 2015-ci il tarixli sərəncamla tutduğu vəzifəsindən azad edilib.

Firudin Cəlilov isə 12 may 1993-cü ildə Azərbaycan Respublikasının ali və orta ixtisas təhsili naziri təyin olunub, 2 sentyabr 1993-cü ildə həmin vəzifədən azad edilib.

Azərbaycan Respublikasının ilk əmək və əhalinin sosial müdafiəsi naziri Akif Kərimov olub. O, 1992-ci il 10 dekabr tarixli Fərmanla Azərbaycan Respublikasının əmək və əhalinin sosial müdafiəsi naziri vəzifəsinə təyin edilib. A.Kərimov 11 ay nazir postunda qala bilib. Belə ki, Akif Kərimov 10 noyabr 1993-cü ildə həmin vəzifədən azad edilib.

Maliyyə nazirlərindən isə Saleh Məmmədov qısa müddətdə, yəni 14 ay bu vəzifədə qala bilib. O, 1992-ci ilin oktyabrında Azərbaycan Respublikasının maliyyə naziri təyin edilib və 1993-cü ilin dekabrında vəzifəsindən azad edilib.