İranda koronavirusun beşinci dalğası ilə bağlı xəbərdarlıq edildi

Koronavirus epidemiyasında ən çox əziyyət çəkən ölkələrdən biri olan İranda yoluxma sayı və insan itkisi yenidən artmaqdadır.

“Anadolu” agentliyi xəbər verir ki, ölkədə 7 iyunda 4 907-ə düşən gündəlik xəstəlik sayı 1 iyulda 14 330 olaraq qeyd edilib və 100-ə enən gündəlik ölüm sayı yenidən 150-yə çatıb.

İranın ən kasıb bölgələrindən biri sayılan Sistan – Bəlucistan əyalətinin cənub-şərqində epidemiya yenidən təhlükəli səviyyəyə qalxdığı üçün ərazisində karantin tətbiq olunub.

Ölkə rəsmiləri və Səhiyyə Nazirliyi virusun 5-ci dalğasi barədə xəbərdarlıq ediblər.

Hətta bəzi səlahiyyətli şəxslər ölkədə 5-ci dalğanı yaşandığını deyirlər.

Ötən sutka ərzində İranda koronavirusa 13 836 yoluxmanın qeydə alınması ilə xəstəlik sayı 3 232 696 olub.

Virusdan 127 nəfərin həyatını itirməsi ilə ölüm sayı 84 516-ya çatıb.

---

Məlumat oxu.az saytından götürülmüşdür.