Britaniyalı keşiş etiraz əlaməti olaraq ağzına tikiş vurub

Britaniyalı keşiş Tim Hyuis media maqnatı Rupert Merdoka məxsus kütləvi informasiya vasitələrinin iqlim dəyişikliyi mövzusuna münasibətdə səssiz qalmasına qarşı etiraz aksiyası keçirib.

Bu barədə “RİA Novosti” məlumat yayıb.

Məlumata əsasən, din xadimi Merdoka aid “News Corporation” şirkətinin binası qarşısında susqunluq əlaməti olaraq, ağzına tikiş vurub. 71 yaşlı Hyuis bütün prosesi videoya çəkərək “YouTube”-da yerləşdirib.

O, ağzını tikməklə Merdokun KİV-inin qlobal iqlim dəyişikliyi problemini inkar etməklə bəşəriyyətə nə qədər ziyan vurduğunu göstərmək istədiyini bildirib. Keşiş milyonçunun bu mövqeyinin siyasətçilər və hakimiyyət nümayəndələrinə də mənfi təsir göstərdiyini vurğulayıb.

Qeyd edək ki, hazırda “News Corporation” şirkəti “The Wall Street Journal”, “Times”, “The Sun” və “New York Post” kimi nəşrlərə, həmçinin “Dow Jones” informasiya agentliyi və bir sıra peyk operatorlarına nəzarət edir.

---

Məlumat oxu.az saytından götürülmüşdür.