Mikelancelonun “David”inin ən dəqiq surəti yaradılacaq – FOTO
![](https://turanmedia.az/wp-content/uploads/2021/01/mikelancelonun-david-inin-en-deqiq-sureti-yaradilacaq-foto-20210104214404.jpg)
Mikelancelonun “David” heykəli, “Expo” Ümumdünya Sərgisində İtaliyanın əsas simvolu olacaq. Sərgi Dubayda “Florensiya Gözəl Sənətlər Akademiyası”nın Qalereyasında nümayiş olunacaq.
“RİA Novosti”nin məlumatına görə, bu barədə muzeyin direktoru Sesiliya Hollberq bildirib.
Çılpaq “David”in təsvir olunduğu heykəl gənc Mikelancelo tərəfindən nəhəng bir karrara mərmər blokundan hazırlanıb. 1504-cü ildə heykəl Florensiyanın mərkəzində quraşdırılıb və tezliklə Florensiya Respublikasının simvolu olub. Heykəl 5 metr 17 santimetr hündürlükdə və 5,6 ton ağırlığındadır. Yağıntıların və küləyin təsirlərindən qorumaq üçün heykəl 1873-cü ildə Avropada ilk rəsm akademiyasının – “Florensiya Gözəl Sənətlər Akademiyası”nın binasına köçürülüb.
Təbii ki, Mikelancelonun şah əsərinin Dubaya göndərilməsindən söhbət gedə bilməzdi, buna görə də elmin son nailiyyətlərindən istifadə edərək dünyanın ən dəqiq heykəl nüsxəsini yaratmaq fikri ortaya çıxıb.
Bu təkliflə İtaliyanın “Expo”dakı Komissarı Paolo Glisenti və milli pavilyon layihəsinin müəllifi Davide Rampello Akademiya Qalereyasının Direktoruna müraciət ediblər.
“David”in surətini çıxarmaq prosesi üç mərhələyə bölünə bilər. Bunlardan birincisində lazer skanerlərdən istifadə edərək heykəlin ən dəqiq rəqəmsal modeli yaradılacaq. Sonra bütün toplanmış məlumatlar ümumiləşdiriləcək və təsdiqlənəcək. Bunların əsasında dünyanın ən böyük 3D printerlərindən birini istifadə edərək, ən dəqiq nüsxəsi “yazdırılacaq”. İşin son, üçüncü mərhələsində, nüsxənin hər hissəsinə Florensiya sənətkarları “əl gəzdirəcək”.
“David”in “Expo”da İtalyan pavilyonunun mərkəzindəki səkkizguşəli “Yaddaş Teatrı”nda quraşdırılacağı gözlənilir.
Məlumat oxu.az saytından götürülmüşdür.