İbrahim Məmmədov: “Müharibənin fəsadlarının aradan qaldırılması ilə bağlı qurumlara tapşırıqlar verilib”

Ermənistanın Azərbaycan ərazilərinə təcavüzü nəticəsində ziyan görmüş infrastrukturun bərpası ilə bağlı aidiyyəti qurumlara tapşırıqlar verilib. 

Oxu.Az-ın müxbirinin verdiyi məlumata görə, bu sözləri bu gün Bakı Biznes Mərkəzində müharibə nəticəsində dəymiş zərərin qiymətləndirilməsi və bunun aradan qaldırılması ilə əlaqədar dövlət tərəfindən görülən işlər barəsində keçirilən brifinqdə Nazirlər Kabinetinin mətbuat xidmətinin rəhbəri İbrahim Məmmədov deyib.

O bildirib ki, infarstrukturun bəpası istiqamətində təlimatlar verilib: 

“Belə ki, Ermənistanın Azərbaycan ərazilərinə təcavüzü nəticəsində dəymiş ziyanın aradan qaldırılmasında Azərbaycan Respublikasının Nəqliyyat, Rabitə və Yüksək Texnologiyalar Nazirliyinə, Azərbaycan Respublikasının Dövlət Neft Şirkətinə, “Azərsu” ASC, “Azərenerji” ASC, “Azərişıq” QSC və Azərbaycan Avtomobil Yolları Dövlət Agentliyinə tapşırılıb ki, infrastruktur obyektlərinə dəymiş ziyanın qiymətləndirilməsini təmin etsinlər və aradan qaldırılması üçün tələb olunan maliyyə vəsaiti barədə təkliflərini 2020-ci il dekabrın 1-dək Komissiyaya təqdim etsinlər”.

“Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə tapşırılıb ki, dəymiş ziyana və onun aradan qaldırılmasına, o cümlədən zərər vurulmuş obyektlərin tam bərpası və təmir-tikinti işlərinin aparılmasına çəkilmiş xərclərə dair vahid məlumat bazasının formalaşdırılmasını 2020-ci il dekabrın 10-dək təmin etsin”-, deyə İ.Məmmədov əlavə edib.

---

Məlumat oxu.az saytından götürülmüşdür.