AzTU-nun kafedra müdiri koronavirusdan vəfat edib

Azərbaycan Texniki Universitetinin (AzTU) Elektronika kafedrasının müdiri, professor Hüseyn Orucov koronavirusdan vəfat edib.

Bu barədə “Report”a AzTU-dan məlumat verilib.

Bildirilib ki, H.Orucov 1970-ci ildə Azərbaycan Dövlət Universitetinin (indiki Bakı Dövlət Universiteti) Fizika fakültəsini bitirib.

1990-cı ildən AzTU-nun Fizika kafedrasında baş müəllim, 1995-ci ildən dosent, 2009-cu ildən professor kimi elmi-pedaqoji fəaliyyətlə məşğul olub.

2010-cu ildə AzTU-nun Elektronika kafedrasına müdir təyin edilib. 2011-ci ildə yenidən bu vəzifəyə müsabiqə yolu ilə seçilib.

120-dən artıq elmi əsərin, ali məktəb tələbələri üçün iki dərslik, dörd dərs və metodiki vəsait, abituriyentlər üçün bir test kitabının müəllifidir. Azərbaycan təhsilinin inkişafındakı xidmətlərinə görə 2011-ci ildə Azərbaycan Respublikası Prezidentinin Sərəncamı ilə “Əməkdar müəllim” fəxri adına layiq görülüb.

Hüseyn Orucov gənc alimlərin hazırlanmasında fəal iştirak edib.

---

Məlumat oxu.az saytından götürülmüşdür.