Prokurorluq orqanlarında işə qəbulla bağlı test imtahanı keçirilib – FOTO

Baş Prokurorluq tərəfindən Dövlət İmtahan Mərkəzi ilə birgə bu gün prokurorluğa işə qəbul olunmaq üçün elan edilmiş sayca 22-ci müsabiqənin ilkin mərhələsi olan test imtahanı keçirilib.

Bu barədə Baş Prokurorluq məlumat yayıb.

Bildirilib ki, imtahan koronavirus epidemiyasının qarşısının alınması məqsədilə Nazirlər Kabineti tərəfindən elan edilmiş xüsusi karantin rejimi qaydalarına uyğun olaraq namizədlərin iştirakı ilə saat 10:00-dan və 15:00-dan başlayaraq 3 saat ərzində kompüterlər vasitəsilə elektron qaydada Dövlət İmtahan Mərkəzinin Bakı şəhəri Nəsimi rayonu Abdulvahab Salamzadə küçəsi 28 ünvanında yerləşən inzibati binasında keçirilmişdir. İmtahanı qeyri-hökumət təşkilatlarının nümayəndələri müşahidə ediblər.

Müsabiqə ilə bağlı müraciəti qeydə alınmış 412 namizəddən 370 nəfəri imtahanda iştirak etmiş, onlardan 70 və daha artıq bal toplamış 162 namizəd müsabiqənin növbəti mərhələsi olan yazılı imtahanda iştirak etmək hüququ qazanıb.

Nəticələr Dövlət İmtahan Mərkəzinin (www.dim.gov.az) və Baş Prokurorluğun (www.prokurorluq.gov.az, www.genprosecutor.gov.az) internet saytlarında yerləşdirilib.

İmtahanda uğurlu nəticə əldə etmiş namizədlərin diqqətinə çatdırılır ki, yazılı imtahanın keçiriləcəyi yer və vaxt barədə kütləvi informasiya vasitələrində və Baş Prokurorluğun internet saytında əlavə məlumat veriləcək.

---

Məlumat oxu.az saytından götürülmüşdür.