Ermənilərin Füzulidə ən çox hansı əraziləri minaladığı açıqlanıb – FOTO

“Hazırda Füzulidə asfalt yolun bərpası həyata keçirilir. Bu səbəbdən əsasən əvvəlki təmas xəttindən keçən yoldakı minaları təmizləyirik. Yalnız bundan sonra asfalt xətti genişləndirilərək orada yenidən təmir işləri aparılır”.

“Report” xəbər verir ki, bu fikirləri Azərbaycan Respublikasının Minatəmizləmə Agentliyinin (ANAMA) 1 saylı təmizləmə qrupunun əməliyyat meneceri Mədət Məmmədov deyib.

Onun sözlərinə görə, təmizləmə bir neçə üsulla aparılır: “Bunlardan biri əllə təmizləmədir ki, bu zaman əməkdaşlar detektor və digər cihazlardan istifadə edirlər. İkinci üsul xüsusi təlim görmüş itlərin vasitəsilə ərazidəki partlamamış hərbi sursatların axtarılmasıdır. Üçüncü üsul isə mexanika vasitəsilə minaların təmizlənməsidir. Hazırda təmizləmə əməliyyatları davam edir. Ərazidə aşkar olunan partlamamış hərbi sursatlar aşkar edilərək gün sonunda partladılır”.

ANAMA rəsmisi bildirib ki, hazırda ərazidə olan 13 km-lik hissə ən təhlükəli ərazi kimi qiymətləndirilir: “Ərazinin artıq 8 km-i minalardan təmizlənib. 5 km üzərində hazırda iş gedir. Ən çox mina əvvəlki təmas xəttindədir. Bura ən yaxın yerdə, təxminən, 8-9 mina sahəsi yerləşir”.

---

Məlumat oxu.az saytından götürülmüşdür.