“Son Gecə” və ya Azərbaycan polisinin işinin görünməyən tərəfi – MÜSAHİBƏ

Fəxrəddin Qurbanov Bakı Şəhər Baş Polis İdarəsinin əməkdaşıdır. Polkovnik-leytenant 30 ilə yaxındır ki, Azərbaycanın daxili işlər orqanlarında çalışır və bu müddətə baxmayaraq, bütün məsuliyyəti və peşəsinə olan sevgisi ilə çalışmağa davam edir.

Bu yaxınlarda onun Oxu.Az-a verdiyi müsahibədə danışdığı kriminal detektiv – “Son Gecə” kitabı çap olundu:

– Kitab yazmaq fikri sizdə nə vaxt yarandı?

– Bilirsiniz, uşaqlıqdan oxumağı sevirəm. Detektiv janrına isə həmişə xüsusi marağım olub. Bəlkə də növbəti maraqlı detektivi oxuduqdan sonra kitabımı yazmağa ilham gəldi. Hər halda, iş təcrübəmi nəzərə alsaq ki, 1993-cü ildən bu yana hakimiyyət orqanlarında çalışıram, özümü yazıçı kimi sınamağa qərar verdim (gülür). Kitabım belə yarandı.

– Polis əməkdaşlarının ümumiyyətlə qarşılaşdıqları iş yükünün ağırlığını nəzərə alsaq, yazmağa da necə vaxt ayıra bilməyinizi təsəvvür etmək çətindir…

– Çox düzgün qeyd etdiniz. Məhz bu səbəbdən bir detektivi yazma prosesi təxminən beş il çəkdi.

– Kitabınız nə barədədir?

– İki cinayət hekayəsindən ibarətdir. Birincisi oğurlanmış avtomobildən, ikincisi gənc bir qızın qaçırılmasından və axtarışından bəhs edir. Əsərin qəhrəmanı keçmiş polis əməkdaşı, detektiv Bəxtiyar Nəzərlidir. Müasir və olduqca maraqlı metodlardan istifadə edərək bu cinayətləri araşdırmağa başlayır. Yeri gəlmişkən, kitabda Qarabağ məsələsinə və iyrənc erməni hiyləgərliyinə də toxunulub.

– Kitabda həqiqi cinayət işlərindən bəhs edilir?

– Əlbətdə, 28 il ərzində daxili işlər orqanlarında topladığım təcrübədən istifadə etmişəm, amma hekayədə düşüncənin təxəyyülü olan çox şey var. Oxucuya təkcə cinayətin tarixi yox, həm də bu cür hallarda özünü necə müdafiə etməyin lazım olduğu barədə məlumat verməyə çalışmışam. Belə deyək, oxucunu maarifləndirirəm.

– Təcrübənizdən ən yaddaqalan və ən mürəkkəb cinayət işi barədə danışa bilərsiniz?

– Bilirsiniz, bir polis əməkdaşı üçün asan və ya çətin bir şey yoxdur. Polis hər vəziyyətə eyni məsuliyyətlə yanaşır. Fakt budur ki, hər hadisənin arxasında insan amili, bəzən də taleyi dayanır. Elə olur ki, kənardan kimsə üçün bu hekayə əhəmiyyətsiz görünür, ancaq qurbanın özü üçün başdan-ayağa faciədir. Məhz bu səbəbdən hər işə eyni məsuliyyətlə yanaşmağa çalışırıq. Bizim üçün ən vacib şey vətəndaşların rahatlığı və təhlükəsizliyidir.

– Bir polis əməkdaşından bu cür sözlər eşitmək çox xoşdur. Potensial oxucunuz kimdir?

– Kitabımın hər nəslin oxucusunu maraqlandıra biləcəyini düşünürəm. Bunu detektiv hekayəmi artıq oxuyanların rəylərinə əsasən deyirəm. Hər şeydən əvvəl bir polis məmuru olaraq gənc nəslin maariflənməsinə diqqət ayırmışam, çalışmışam ki, narkomaniya və ondan irəli gələn digər cinayətlərin bütün nəticələrini çatdırım.

Bundan başqa, Azərbaycan polisinin işinin görünməyən tərəfini göstərməyə çalışmışam.

– İlk kitabın davamını gözləyək?

– Elə ikinci hissə üzərində işləyirəm. O da detektiv janrında təqdim ediləcək. Və bir növ “Son Gecə”nin davamı ola bilər.

---

Məlumat oxu.az saytından götürülmüşdür.