Rubendə “panik-atak”lar başladı: sərvətini itirir… – Video

Azərbaycanın rus sülhməramlıların müvəqqəti məsuliyyət zonasında olan Xankəndi şəhərinə separatçılığı təşviq etmək üçün Rusiyadan göndərilən milyarder-emissar Ruben Vardanyan çarəsizliyini əks etdirən status paylaşıb.

Turanmedia.az axar.az-a istinadən xəbər verir ki, Vardanyan heç bir təklif vermək, vəziyyəti dürüst qiymətləndirmək gücündə olmadığını bir daha nümayiş etdirib.

“Heç nə etmək mümkün olmayanda nə etmək lazımdır? Məbəd tikək”, – deyə Vardanyan “özünəməxsus şəkildə” ideya verib.

O bildirib ki, yanacaq yoxdursa, at sürək, piyada gəzək, əlaqə yoxdursa, vərəqə məktub yazaq:

“Bu gün qərar verdik ki, Müqəddəs Akobavanka məbədini bərpa edək: boş əllə – necə ki, əcdadlarımız edib – yanacaqsız, lazımi tikinti materialları olmadan”.

Vardanyan deyib ki, hər kəs əlindən gələni etsin, məbədi bərpa edək, çünki məbəd bizə əlavə güc verir.

Belə məlum olur ki, milyardlarının girovuna çevrilərək, Xankəndiyə gəlməyə məcbur olan Vardanyanda sərvətini itirmək qorxusundan artıq “panik-ataklar” başlayıb.