Gürcüstanda səslərin 99,9 faizi sayıldı: 7 partiya və 2 blok parlamentə daxil oldu

Gürcüstanda keçirilən seçkilərin nəticələrinə əsasən yeddi partiya və iki blok parlamentdə təmsil olunmağa haqq qazanıb.

Bu barədə Gürcüstanın Mərkəzi Seçki Komissiyasının açıqladığı nəticələrdən bəlli olub.

Gürcüstan MSK 3843 məntəqədə (99,9 faiz) səslərin sayılması prosesinin başa çatdığını qeyd edib.

Nəticələrə əsasən hazırkı hakim “Gürcü arzusu – demokratik Gürcüstan” Partiyası (48,15 faiz) və müxalifət bloku “Güс birlikdədir” (27,13 faiz) parlamentə daxil olub. Qeyd edək ki, keçmiş hakim partiya “Vahid Milli Hərəkat” da müxalifət blokunun tərkibindədir.

Bununla yanaşı bir faizlik baryeri aşağıdakı siyasi subyektlər keçə bilib:

“Avropa Gürcüstanı” (David Bakradze) – 3,78%;

“Lelo Gürcüstan üçü” (Mamuka Xazaradze) – 3,16%;

“Vətənpərvərlər ittifaqı” (İrma İnaşvili)  – 3,15%;

“Giorgi Vaşadze – Aqmaşenebeli strategiyası”  – 3,15%;

“Qirçi” (Zurab Caparidze) – 2,89%;

“Vətəndaşlar” (Aleko Elisaşvili)  – 1,33%;

“Leyborist” (Şalva Natelaşvili) – 1%.

Digər partiyalar, o cümlədən Rusiya ilə münasibətlərin yoluna qoyulması mövqeyindən çıxış edən Nino Burcanadzenin “Vahid Gürcüstan” Partiyası (0,85 faiz) bir faizlik səddi keçə bilməyib.

Xatırladaq ki, Gürcüstanda 31 oktyabrda keçirilən seçkilərdə 48 partiya və iki seçki bloku iştirak edib.

---

Məlumat oxu.az saytından götürülmüşdür.