Varşavada Azərbaycanın Qarabağda əldə etdiyi qələbə münasibətilə avtoyürüş keçirilib
![](https://turanmedia.az/wp-content/uploads/2020/11/varsavada-azerbaycanin-qarabagda-elde-etdiyi-qelebe-munasibetile-avtoyurus-kecirilib-20201112130603.jpg)
Varşava şəhərində Polşa Azərbaycanlıları Koordinasiya Şurasının və Polşadakı azərbaycanlı icmanın təşəbbüsü ilə “Qarabağ Azərbaycandır!” şüarı altında avtoyürüş keçirilib.
Avtoyürüşə Varşava şəhərində yaşayan azərbaycanlılarla yanaşı, Krakov, Qdansk və Lublin şəhərində yaşayan həmvətənlərimiz, eləcə də, Ukrayna icmasının nümayəndələri qoşulub.
Bu barədə Diasporla İş Üzrə Dövlət Komitəsi məlumat yayıb.
Həmvətənlərimiz Azərbaycan bayraqları asılan maşınlarla şəhər küçələri boyunca dövrə vurub, xarici ölkələrin Polşadakı səfirliklərinin qarşısından keçib və sonda mərkəzi meydançaya toplaşaraq, havaya fişənglər atıblar.
əYürüş iştirakçıları müqəddəs bayrağımızın qədim mədəniyyət beşiyi olan Şuşa şəhərində yenidən dalğalanmasının Azərbaycandan kənarda yaşayan hər bir azərbaycanlıya qürur və sevinc bəxş etdiyini bildiriblər.
Azərbaycanlı icmanın nümayəndələri döyüş meydanında qazanılan şanlı qələbəyə görə Ali Baş Komandan İlham Əliyevə və müzəffər ordumuza minnətdarlıqlarını ifadə ediblər.
Daha sonra yürüş iştirakçıları Polşadakı Azərbaycan Evini ziyarət edərək üçrəngli Azərbaycan bayrağı ilə xatirə fotosu çəkdiriblər.
Məlumat oxu.az saytından götürülmüşdür.