Azərbaycan qazı artıq Yunanıstan ərazisindədir

Trans Adriatik Boru Kəməri (TAP) vasitəsilə Yunanıstan Azərbaycanın təbii qazını qəbul etməyə başladı.

Bu barədə ölkənin milli təbii qaz şirkəti DEPA-nın direktoru Konstantinos Xifaras mətbuata açıqlama verib.

O bildirib ki, Azərbaycandan Yunanıstana təbii qazın verilməsinə başlanılması yeni dönüş nöqtəsidir.

Bundan əvvəl, Bolqarıstanın Baş naziri Boyko Borisov da Bolqarıstanın Xəzər dənizindən Azərbaycan təbii qazını almağa başladığını və bunun enerji təchizatının şaxələndirilməsi istiqamətində mühüm bir addım olduğunu açıqlayıb.

Xatırladaq ki, daha əvvəl Bolqarıstanın Baş naziri Boyko Borisov bir milyard kubmetrdən çox Azərbaycan qazının artıq Bolqarıstan ərazisinə daxil olduğu barədə məlumat vermişdi.

B.Borisov bununla da gələcəkdə Bolqarıstanın qaz tədarükü ilə bağlı problemləri yaranmayacağını və Azərbaycan qazının ölkəyə nəql edilməsi ilə birgə təbii qaz şaxələndirilməsinə nail olunacağını əlavə etmişdi.

Qeyd edək ki, Trans Adriatik Boru kəməri ümumi layihə dəyəri 40 milyard ABŞ dolları olan Cənub Qaz Dəhlizinin tərkib hissəsidir. TAP-ın kommersiya fəaliyyətinə keçid etməsi ilə Azərbaycan Avropa bazarına ilkin mərhələdə 10 milyard kubmetr, daha sonra isə 20 milyard kubmetrə qədər qaz nəqlini həyata keçirəcək.

TAP-ın ümumi layihə dəyəri 4,5 milyard avro həcmindədir. TAP-da BP 20 faiz, SOCAR 20 faiz, “Snam S.p.A” 20 faiz, “Fluxys” 19 faiz, “Enagas” 16 faiz və “Axpo” 5 faiz paya sahibdirlər. 2020-ci ilin sonunda artıq TAP Avropaya qaz nəqlinə start verdi və bununla da Bolqarıstanın qaz tələbatının 30 faizi, Yunanistanın qaz tələbatının 20 faizi və İtaliyanın qaza olan tələbatının təxminən 10 faizi təmin ediləcək.

---

Məlumat oxu.az saytından götürülmüşdür.