Yeni tamaşa – “Yay günü”
Turanmedia.az xəbər verir ki, Azərbaycan Dövlət Akademik Milli Dram teatrında Slovamir Mrojekin Yay günü tamaşasının premyerası oldu.
Qeyd edək ki, tamaşa aktual bir mövzuya – intihar mövzusuna həsr olunub. İki intihar etmək istəyən insanların bir biri ilə toqquşması, arada yaranan təzadlar, bu təzadlardan doğan yeni ideyalar tamaşaçının marağına səbəb olur. Məlum olur ki, hətta ölüm ayağında belə, uğurlu və uğursuz insan faktoru toqquşur, və sonda qalib öz növbəti uğurunun təntənəsinə daha da çox inanır.
Tamaşada rejissor (rej. Mehman Fətullayev) həlli maraqlıdır. Bütün hadisələr yığcam, lakonik şəkildə bir birini tamamlayır, iri planda kölgə effektlərinin səhnədə görünməsi, uyumlu musiqi seçimi, dekor hər şey tamaşanın baxımlı, yaddaqalan olmasına xidmət edir.
Aktyor oyununu xüsusi qeyd etmək istəyirəm. İstedadlı aktyor Ramin Şıxəliyev öz personajının nəyə qadir olduğunu çox yaxşı bilir. Ən əsası isə bunu tədricən tamaşaçıya göstərir. Tamaşaçı obrazın dərin mahiyyətinə vardıqca, aktyorun təsiri altına tez düşür və səhnədən səhnəyə obraz kamilləşir. Ramin Şıxəliyev illərdir ki, səhnədədir və bir birindən maraqlı rolları özunəməxsus şəkildə tamaşaçısına çatdırmağa müvəffəq olur.
Digər obrazın ifaçısı – Elsevər Rəhimovu xüsusi qeyd etmək istəyirəm. Gənc aktyor əvvəla səhnəyə çox yaraşır ki, düşünürəm bu da vacib faktordur, ikinci isə öz rolunun öhdəsindən layiqincə gəlir. Aktyor, obrazının məsumluğunu, saflığını o qədər təbiii tamaşaçıya ötürür ki, tamaşacı obrazı tez bir zamanda sevir və hadisələrin gedişatını daha maraqla izləyir. Məhz belə istedadlı gənclərin səhnədə olması məncə teatrın gələcəyinin əminliyindən xəbər verir .
Digər gənc aktrisa – Lalə Süleymanova maraqlı performansı ilə yadda qaldı. Aktrisa səhnədə şirinliyi, özunəməxsus koloriti ilə bir qadın obrazını bizə sevdirməyə müvəffəq oldu desək daha doğru olar.
Düşünürəm ki, yeni tamaşa teatrın repertuarında öz layiqli yerini tutacaq və ümümiyyətlə bu gün, rejissorların bu qəbildən olan aktual mövzulara səhnədə güzgü tutması həm sevindirici bir haldı həm də labüddür.
Bütün yaradıcı kollektivə uğurlar !
Təranə Feyzullayeva