Mingəçevir kənd yaşayış massivinin sakinləri problemlərdən danışdı

Turanmedia.az xəbər verir ki, Mingəçevir şəhər İcra Hakimiyyətinin başçısı İlham İsmayılovun sakinlərlə növbəti səyyar görüşü Mingəçevir kənd yaşayış massivində oldu. Görüşə yaşayış massivinin sakinləri ilə yanaşı şəhər İcra Hakimiyyəti başçısı aparatının məsul əməkdaşları, idarə, müəssisə və təşkilatların rəhbərləri və təmsilçiləri, ictimaiyyət nümayəndələri, mətbuat işçiləri dəvət olunmuşdular. Görüşdə Milli Məclisin deputatı Aydın Mirzəzadə, şəhər polis şöbəsinin rəisi,polkovnik Ədalət Əliyev də iştirak edirdilər. Mingəçevir şəhər İcra Hakimiyyətinin başçısı İlham İsmayılov görüşü açaraq Azərbaycan Respublikasının Prezidenti İlham Əliyevin rəhbərliyi ilə ölkəmizin bütün regionlarında olduğu kimi, Mingəçevirdə də həyata keçirilən tikinti-quruculuq işlərinin sürətləndirildiyindən danışdı. Bildirib ki, bü günkü səyyar görüşün keçirilməsində əsas məqsəd bir daha sizi dinləmək, qaldırılan problem və məsələlərin həlli istiqamətində əməli tədbirlər görməkdir. Zalda qoyulmuş sərbəst mikrafondan istifadə edərək özünüzü təqdim etməklə təkliflərinizi bildirməyi xahiş edirəm. Mingəçevir kənd yaşayış massivi sakinlərindən İdris Fərruxov, Xumarə Abdullayeva, Anar Xasməmmədov, Zöhrə Mustafayeva, Qumru Rəcəbova, Nəzir Mirzəyev, Zamir Yunisov, Şahmalı Mustafayev, Nigar Mustafayeva, Sədaqət Mustafayeva, İmran Yolçuyev, Elxan Şərifov, Etibar Əhmədov, Taleh Süleymanzadə və başqaları çıxış edərək onlara göstərilən diqqət və qayğıya görə ölkə rəhbəri, möhtərəm Prezidentimiz İlham Əliyevə, şəhər İcra Hakimiyyətinə minnətdarlıqlarını bildirdilər. Eyni zamanda qarşılaşdıqları çətinlikləri dilə gətirdilər. Xüsusilə qeyd olundu ki, Mingəçevir kənd yaşayış massivində insanların arzu və istəyinə uyğun olaraq icra olunan kanalizasiya sisteminin qurulması insanların ən böyük tələbatıdır. Lakin bu sistemin ardıcıl yerinə yetirilməsində bir sıra problemlər üzə çıxır. Çox istərdik ki, “Azərsu” rəhbərliyi və Sukanal idarəsi işlərin gedişinə ciddi nəzarət etsinlər. O cümlədən kənd yaşayış massivində işıq xətlərinin və dirəklərinin quraşdırlımasında nöqsanlar vardır. Bəzi küçələr qaranlıqda qalır, işıqlanma zəif olur. Burada uşaq bağçasının əsaslı təmirinə böyük ehtiyac var. Bir sözlə, bu bağça tamamilə yenidən qurulmalıdır. Sakinlər işsizliyin aradan qaldırlıması barədə də fikirlərini bildirdilər. Sakinləri daha çox narahat edən problemlərdən biri də Mingəçevir şəhər xəstəxanasında olan bəzi neqativ hallar olub.Qaldırılan bütün məsələlər ətrafında fikirlərini sakinlərə çatdıran icra başçısı qeyd etdi ki, şəhərdə aparılan abadlıq-quruculuq işləri timsalında bütün bu çatışmazlıqlara sön qoyulacaq və onlar mərhələ-mərhələ öz həllini tapacaqdır. Bu məqsədlə görüşdə iştirak edən İcra Hakimiyyətinin məsul əməkdaşlarına, idarə, müəssisə və təşkilat rəhbərlərinə tapşırıqlarını verdi.

Esmira Hidayətova,Mingəçevir.