Lirənin ucuzlaşmasının Azərbaycana hansı təsirləri var?
![](https://turanmedia.az/wp-content/uploads/2023/06/02-2-730x393.jpg)
Türkiyədə prezident seçkilərindən sonra qalib Kılıcdaroğlu olsa da, lirə mütləq dəyərdən düşəcəkdi.
Turanmedia.az olke.az-a istinadən xəbər verir ki, bunu iqtisadçı ekspert Natiq Cəfərli deyib. O bildirib ki, iqtidarlı-müxalifətli pafosun, populizmin, vəədlərin son günlərdəki ucuzlaşmada payı olsa da, əsas səbəbləri obyektiv və subyektiv olaraq ayırmaq olar:
“Obyektiv səbəblər kimi Türkiyənin enerjidən kəskin asılılığı, kovid oyununun 3 il (2020-22) Türkiyənin əsas gəlir mənbələrindən biri olan turizmi kəskin vurması, ixracatın artımının idxalı da artırmasını göstərmək olar.
Subyektiv səbəblər isə Mərkəzi Bankın müstəqilliyinin və subyektivliyinin əlindən alınması, “faiz səbəb – inflyasiya nəticədir” israrları, iqtisadi institutların zəifləməsi, məhkəmənin müstəqilliyinə kölgə düşürülməsi, populist “solvari” siyasət, dövlət xərclərinin kəskin artırılması, son 4 ildə durmadan (təqribən 1 trilyon lirə) pul çap edilməsidir.
Yəni, bu gün görünən son 10 ilin kobud səhvlərinin təzahürüdür”.
Ekspert lirənin ucuzlaşmasının manata təsirinin olmadığını deyib. Azərbaycana təsirlərinə gəlincə isə ekspert bildirib ki, inhisarçı iqtisadiyyat olmasa idi, hətta pozitiv təsiri olacaqdı, Türkiyə malları kəskin ucuzlaşacaqdı: “Lakin bir müsbət təsiri var, o da vətəndaşlar üçün Türkiyəyə səfər etmək yayda daha sərfəli olacaq”.